Over 60 kan ha mista livet i flaumråka gullgruver i Zimbabwe

Minst 60 menneske er frykta omkomne etter at gullgruver blei fylte med vatn i ein by i Zimbabwe.

Vatn byrja å trenge inn i to ubrukte gruvesjakter i byen Kadoma tysdag kveld. I sjaktene skal det ha vore mellom 60 og 70 gullgravarar. Fredag erkjente styresmaktene at det er små sjansar for å finne nokon i live.

- Det blir jobba intenst for å pumpe vatnet ut av dei flaumråka gruvegangane før offera kan hentast ut, seier July Moyo, Zimbabwes minister for lokalt sjølvstyre.

President Emmerson Mnangagwa har erklært nasjonal krisesituasjon. Zimbabwe er òg ramma av økonomisk krise, og regjeringa ber både bistandsgivarar og aktørar i næringslivet bidra med pengar til redningsaksjonen og hjelp til dei etterlatne.

Gullgravarane var truleg ulovleg i dei nedlagde gruvesjaktene då ulykka skjedde. Zimbabwe har store førekomstar både av gull, diamantar, platina, kol og koppar.

(©NPK)

Gruvearbeidarar fraktar inn utstyr som skal brukast i arbeidet for å hente ut gullgravarane frå dei flaumråka gruvene i Kadoma i Zimbabwe. Foto: Tsvangirayi Mukwazhi / AP / NTB scanpix

Annonse
Annonse