Pakistansk ambassadør skal ha vorte freista drepen i Kabul

Pakistans ambassadør i Afghanistan vart fredag utsett for eit attentat, ifølgje Pakistans statsminister Shahbaz Sharif.

Ambassadøren vart ikkje skadd, men ei livvakt vart kritisk såra, opplyser det pakistanske utanriksdepartementet.

Ein talsmann for det afghanske utanriksdepartementet fordømmer angrepet på det kraftigaste og lovar ei etterforsking som skal føre til at dei skuldige blir stilte til ansvar.

Angrepet mot ambassaden i Kabul skjer i ei tid der forholdet mellom Afghanistan og Pakistan blir stadig meir anstrengt.

Skytinga mot ambassaden kom dagen etter at den pakistanske regjeringa kravde at Taliban-regimet i nabolandet hindrar at det blir planlagt terrorangrep mot Pakistan på afghansk jord.

Tidlegare i veka tok pakistansk Taliban ansvar for eit sjølvmordsangrep sørvest i Pakistan. Fire menneske vart drepne av bomba, som såg ut til å vere retta mot politifolk som skulle verne helsearbeidarar som vaksinerer folk mot polio.

(©NPK)