Partane i Jemen har vorte einige om fangeutveksling

FNs Jemen-utsending Martin Griffiths opplyser at partane i Jemen-krigen har vorte einige om ei fangeutveksling.

Fredssamtalane for det krigsherja landet opna torsdag i Sverige, og partane har så langt komme med utspel om krava sine og forhandlingsposisjonar. Fangeutvekslinga er det første positive teiknet frå Stockholm.

Griffiths omtalte samtalane som ei kritisk viktig moglegheit og ein «milepæl».

Jemens internasjonalt anerkjente regjering, som vart jaga i eksil i 2015, krev at Houthi-opprørarane trekkjer seg ut av den strategisk viktige hamnebyen Hodeida.

- Kupp-militsen må trekkje seg heilt bort frå vestkysten og overlate området til den legitime regjeringa, tvitrar Jemens utanriksminister Khaled al-Yamani.

Houthi-opprørarane truar på si side med å stengje flyplassen i hovudstaden Sana for FN-fly, dersom fredsforhandlingane i Sverige ikkje resulterer i at han blir heilt opna igjen.

Saudi-Arabia gjekk til krig mot houthiane i mars 2015 og har innført full blokade av landet, i eit forsøk på å få president Abd-Rabbu Mansour Hadi og regjeringa hans tilbake.

- Dersom flyplassen i Jemens hovudstad ikkje blir opna igjen for det jemenittiske folk, vil eg be vårt politiske råd og regjeringa i Sana om å stengje flyplassen for alle fly, tvitrar opprørsleiaren Mohammed Ali al-Huthi.

(©NPK)

Utanriksminister Margot Wallström og FNs Jemen-utsending Martin Griffith held pressekonferanse på Johannesburg slott i Rimbo nord for Stockholm torsdag. Foto: Stina Stjernkvist/TT / NTB scanpix

ANNONSE
Annonse