Paven krev handling på toppmøte om overgrep

- Det held ikkje å fordømme seksuelle overgrep. Guds heilage folk ser på oss. Dei forventar at vi vedtek konkrete og effektive tiltak, sa pave Frans under opninga av toppmøtet i Vatikanet torsdag.

Gjennom fire dagar skal biskopar, kardinalar og andre kyrkjeleiarar frå heile verda drøfte og lære om nedkjemping av overgrep.

Den katolske kyrkja har i ei årrekke vorte ramma av ei lang rekke avsløringar av seksuallovbrot gjort av prestar i ei rekke land. Mange av offera er gutar og menn, men òg kvinner har vorte ramma.

Så seint som denne månaden måtte pave Frans erkjenne at nokre katolske prestar kan ha brukt nonner som sexslavar.

Kyrkja har fått massiv kritikk for ei rekke tilfelle der gjerningsmenn har vorte skjerma og overgrep forsøkt skjult. Møtet i Vatikanet denne veka blir tolka som eit teikn på at pave Frans prøver å ta grep og oppnå endring.

Paven kalla på jomfru Maria og bad henne om å opplyse biskopar i forsøket deira på å «lækje dei djupe såra som overgrepskanalen har påført både barn og truande».

- La oss høyre på ropa til barna som ber om rettferd, sa han.

(©NPK)

Pave Frans meiner at deltakarane på toppmøtet i Vatikanet må komme opp med konkrete og effektive tiltak dersom den romersk-katolske kyrkja skal klare å nedkjempe seksuelle overgrep. Foto: Vincenzo Pinto / AP / NTB scanpix

Deltakarane på toppmøtet i Vatikanet vert oppfordra til å komme opp med konkrete og effektive tiltak, dersom den romersk-katolske kyrkja skal klare å nedkjempe seksuelle overgrep. Foto: Vincenzo Pinto / AP / NTB scanpix