Pengeregn i Kitzbühel: Jansrud og Kristoffersen kan tene éin million kroner kvar

Prispengane i utfor og slalåm i Hahnenkamm-rennene i Kitzbühel når nye høgder. Vinnaren av kvart renn får éin million kroner.

I begge disiplinane har Noreg køyrarar som i høgaste grad kan vere med å kjempe om gullet, Kjetil Jansrud i fartsdisiplinen og Henrik Kristoffersen i slalåm.

Begge risikerer å kunne fylle på bankkontoen med eit sjusifra beløp. Arrangørane av det prestisjetunge alpinshowet har avgjort at prispengane blir auka til éin million kroner (100.000 euro) for vinnaren av både utfor- og slalåmrennet.

Aldri tidlegare har det vorte utbetalt så mange pengar til vinnaren av eitt enkelt renn i alpint. Også dei andre pallplasseringane får godt betalt. 50.000 euro fell til andreplassen, medan tredjemann får 25.000 euro.

I tillegg til Jansrud, som vann utforrennet i Kitzbühel i 2015, kan òg Aleksander Aamodt Kilde blande seg inn i millionkampen i januar.

I Super G-rennet vil premiepengane vere 68.500 euro for førsteplass, i underkant av 700.000 kroner, heller ikkje det er dårleg betalt. 34.250 og 17.100 euro går til andre- og tredjeplassen.

Det tradisjonsrike rennet, som blir rekna som eitt av høgdepunkta i sesongen, har jubileum i januar. Då blir det arrangert for 80. gong.

Arrangørane seier dei ikkje ønsker å bruke «jubileumspengane» på å lage ein større folkefest, men heller «anerkjenne dei ekstraordinære prestasjonane til utøvarane».

(©NPK)

Kjetil Jansrud på veg mot mål under fjorårets utforrenn i Kitzbühel. Vinnaren av neste års renn får éin million kroner i premie. Foto: Cornelius Poppe / NTB scanpix

Annonse
Annonse