Polen med ny gåvepakke i EM: Svensk siger med 28–18
Sverige brukte ikkje all kraft då dei slo eit svakt Polen 28–18 i handball-EM. Svenskane styrkte sjansane sine til å nå semifinalen.
Polakkane var svært gjevmilde og hadde over ti tekniske feil dei første 22 minutta. Sverige skaffa seg ei klar leiing inn mot pause (14–6).
Noreg køyrde over Polen torsdag, då Polen tapte 31–42.
Svenskane er oppe i fire poeng på tre kampar i hovudrunden. Sverige har igjen Tyskland (søndag) og Noreg (tysdag).
Den svenske troppen har med eitt unntak sloppe unna koronasmitte det siste døgnet. Ingen spelarar har vorte smitta, men éin av fysioterapeutane til laget avla positiv test fredag.
(©NPK)
Sveriges norske trenar Glenn Solberg under EM-kampen mot Polen. Foto: Annika Byrde / NTB
