Politiet etterforskar Ap-politikar for fiktive reiserekningar
Politiet stadfestar at dei etterforskar Hege Haukeland Liadal, som sit på Stortinget for Ap, etter mistanke om at ho har levert fiktive reiserekningar.
Den 46 år gamle stortingsrepresentanten frå Haugesund og nestleiaren i Rogaland Ap, vart politimeldt då Aftenposten 9. april i år avslørte at ho hadde levert fiktive reiserekningar til Stortinget. Liadal har status som mistenkt i saka, skriv Aftenposten.
Liadal vart politimeldt av Stortingsadministrasjonen kort tid etter avsløringa. Vel fire månader seinare stadfestar politiet at økonomiseksjonen i Oslo politidistrikt er i gang med etterforskinga.
- Vi er ein i fase der vi innhentar og gjennomgår relevant dokumentasjon, og representanten har status som mistenkt, seier politiinspektør Ole Rasmus Knudsen ved påtaleavsnittet for økonomi- og spesiallovgiving.
Aftenposten dokumenterte i reportasjen sin at Liadal hadde levert reiserekningar for over 60.000 kroner der ho enten hadde vore ein annan stad enn det ho hadde oppgitt, eller heime, på hytta eller på private reiser.
Politiet opplyser at dei ikkje har avhøyrt Liadal. Ap-politikaren vil ikkje kommentere saka overfor Aftenposten. Det vil heller ikkje Stortinget gjere.
(©NPK)
Hege Haukeland Liadal (Ap) til høgre, vert no etterforska av politiet. Foto: Jon Olav Nesvold / NTB scanpix
