Politiet leitar framleis etter anteke skadd person i Bergen
Politiet i Bergen står framleis utan fornærma person etter ei mogleg knivstikking torsdag. Heller ikkje ein DNA-analyse gav svar på kven den skadde kan vere.
– Det har komme inn svar på DNA-analysen, men svara er ukjent. Det vil seie at vedkommande ikkje ligg inne i systemet. Det er litt skuffande, men vi følgjer opp eit par andre spor, så får vi sjå kva som skjer vidare, seier politiadvokat Linn Marie Søfteland til Bergensavisen.
Det var torsdag morgon at politiet rykte til ei adresse på Landås i Bergen etter melding om ei mogleg knivstikking. Sidan har tre menn vorte arresterte og sikta for kroppsskade eller medverknad til dette – utan at den fornærma er funnen.
Det var ein del blod på staden, så politiet fryktar at vedkommande er alvorleg skadd. Det biologiske materialet frå staden vart sendt til hurtiganalyse.
Torsdag sa politiet at dei er bekymra for at det skal liggje ein skadd person ein stad.
– Det viktigaste no er at vi finn vedkommande. Vi er litt bekymra for at ein person kan liggje skadd ein stad, sa Søfteland til BA.
(©NPK)
