Politiet vil krevje Tengs-sikta framleis fengsla
Påtalemakta vil be om framleis fengsling for 51-åringen som er sikta for drapet på Birgitte Tengs når varetekta går ut tysdag.
Sist retten tok stilling til om 51-åringen skulle haldast i varetekt, var i byrjinga av juli. Då skreiv Sør-Rogaland tingrett at retten hadde lagt særleg vekt på arten og alvoret i saka, mistankegrunnlaget og forventa straff i tilfelle domfelling, og at dei ikkje fann det problematisk å setje varetektstida til tolv veker.
Når det blir halde nytt fengslingsmøte når varetekta går ut tysdag neste veke, vil 51-åringen, som i tidlegare rettsmøte, krevje seg lauslaten.
– Han motset seg prinsipielt varetekt sjølv om han godtek at sjølve fengslingsmøtet blir gjennomført som kontorforretning, seier advokat Stian Kristensen, som er forsvararen til mannen.
Sørvest politidistrikt opplyste fredag til NTB at politiadvokat Unni Byberg Malmin vil be retten om framleis varetekt av mannen fram mot rettssaka.
Drapssaka mot 51-åringen, som er sikta for drapet på Birgitte Tengs i 1995, er dagsett til å starte i Haugaland og Sunnhordland tingrett 31. oktober eller 14. november. Det er sett av tolv veker til rettsbehandlinga.
Politiet sende i midten av september over alt etterforskingsmaterialet i saka over til Den høgare påtalemakta for å avgjere spørsmålet om tiltale i saka mot 51-åringen.
(©NPK)
Politiadvokat Unni Byberg Malmin i Sør-Rogaland tingrett i det første fengslingsmøtet i september i fjor for mannen som er sikta for drapet på Birgitte Tengs og mistenkt for drapet på Tina Jørgensen. Foto: Jan Kåre Ness / NTB
