Politikarar reflekterer over 22. juli i sosiale medium
Refleksjon og kritikk av debatten etter 22. juli-terroren i 2011 kjenneteiknar Facebook-innlegg frå fleire politikarar på tiårsdagen for angrepa.
Jon Georg Dale i Framstegspartiet stiller spørsmål om behandlinga av overlevande etter 22. juli.
– Dei siste vekene har vi fått høyre sterke vitnesbyrd frå dei som var og er ramma av terroren. Det er sterke historier om å bli ståande åleine, ikkje kjenne seg tilstrekkeleg vareteke, og verst av alt: å bli mistenkjeleggjort og kritisert for å ha overlevd det verste terrorangrepet i vår felles historie. Tenk at våre ungdommar måtte kjenne på det etter ei slik hending. I ettertid må vi spørje oss sjølv om korleis vi kunne la dette skje, skriv den tidlegare samferdsels- og landbruksministeren på Facebook.
SV-leiar Audun Lysbakken skriv at ein må snakke om 22. juli «som hva det var.»
– Eit politisk motivert og høgreekstremt angrep på AUF og Arbeidarpartiet. Eit angrep inspirert av rasistiske idear og muslimhat, skriv han på Facebook.
Han legg til at beredskap òg handlar om å kjempe mot idear som avlar vald.
– Vi som samfunn må erkjenne at vi ikkje har vore flinke nok, verken før eller etter 22. juli, skriv kulturminister Abid Raja (V) på Facebook.
Han skriv vidare at det ikkje var ein blind terror, men tvert imot svært målretta som ramma Noreg 22. juli 2011. Raja trekkjer parallellar mellom ideologien til terroristen og ideologien bak terrorangrepet mot Al-Noor-moskeen i Bærum i 2019.
– Vi skal minnast, vi skal aldri gløyme, og vi skal ta kampen mot ideologien som fører med seg vondskap, avsluttar Raja.
(©NPK)
Jon Georg Dale frå Framstegspartiet spør korleis det er mogleg at Utøya-overlevande blei utsette for mistenkjeleggjering etter terroren.
Foto: Håkon Mosvold Larsen / NTB / NPK
