Politisk krise i Nepal
Fraksjonar i Nepals regjeringsparti står mot kvarandre og det er store demonstrasjonar i hovudstaden etter at presidenten i desember skreiv ut nyval.
Titusenvis av tilhengjarar av Nepals kommunistparti (NCP) marsjerte fredag gjennom hovudstaden Katmandu, med krav om at oppløysinga av nasjonalforsamlinga blir oppheva.
Forsamlinga vart oppløyst då presidenten kunngjorde at det vil bli halde nyval 30. april og 10. mai.
Protesten på fredag var den hittil største, men det har vore halde demonstrasjonar med jamne mellomrom sidan desember.
Statsminister Khadga Prasad Sharma Oli tilhøyrer òg NCP, men det var han som bad president Bidya Devi Bhandari oppløyse nasjonalforsamlinga og utskrive nyval. Det gjorde han i protest mot at partifellane ikkje lét han gjennomføre politikken sin. Fleire av dei hadde tidlegare stilt mistillitsforslag mot han.
– Vi er midt i ei grunnlovskrise, seier Madhav Kumar Nepal, som er ein av leiarane bak NCPs demonstrasjonar.
Tre tidlegare statsministrar frå NCP og dei fleste opposisjonspartia meiner Olis grep er grunnlovsstridige, og spørsmålet skal no behandlast i høgsteretten i landet.
Både Olis tilhengjarar og demonstrantane hevdar å representere den legitime fraksjonen i NCP og gjer krav på namna og symbola til partiet.
(©NPK)
Motstandarar av statsministeren samla seg i Nepals hovudstad Katmandu fredag. Foto: Niranjan Shrestha / AP / NTB
