Putin meiner alt går etter planen
President Vladimir Putin hevdar den «spesielle militæroperasjonen» held fram med å gå etter planen, meir enn fire månader inn i Russlands krig i Ukraina.
Putin beskreiv dei russiske soldatane som heltar då han møtte journalistar under eit besøk i Turkmenistan onsdag. Han sa at han «spesielle militæroperasjonen» går som han skal, og at troppane har nådd fleire milepælar.
– Alt går etter planen, sa Putin ifølgje det statlege nyheitsbyrået Tass.
Russiske troppar invaderte Ukraina 24. februar i år, men styresmaktene i landet nektar å omtale det som invasjon eller krig. Dei omtaler det derimot som russiske spesialoperasjonar.
Etter å ha feila i å nå den ukrainske hovudstaden Kyiv, har russiske styrkar fokusert på Donbas-regionen i Aust-Ukraina. Putin nekta å svare journalistane på kor lenge kampane vil vare, og sa det ville vere feil å setje nokre tidsfristar.
(©NPK)
Russlands president Vladimir Putin under eit besøk i Turkmenistan 30. juni. Foto: Dmitry Azarov / AP / NTB