Rapport: Manglende etterforsking av valdtektssaker i Rogaland
Halvparten av undersøkte valdtektssaker i Sørvest politidistrikt kunne vore etterforska betre, ifølgje ein ny rapport frå statsadvokatane i Rogaland.
I inspeksjonsrapporten kjem det fram at 55 prosent av undersøkte valdtektssaker ikkje har ein tilfredsstillande etterforskingsplan, ifølgje Stavanger Aftenblad. Samtidig er framdrifta i 75 prosent av sakene rekna som ikkje tilfredsstillande.
- Vi ser at både politiadvokatar og etterforskarar har det travelt. Vi meiner likevel at dei må utnytte dei ressursane dei har betre. Ein etterforskingsplan er eit verkemiddel for å sikre ei målretta etterforsking, seier statsadvokat Nina Grande til avisa.
- Det betyr ikkje nødvendigvis at etterforskinga av valdtektssaker er dårleg, men vi meiner den i fleire tilfelle kunne vore betre, seier Grande.
Undersøkinga er basert på 63 valdtektssaker som vart melde til politiet mellom 1. januar og 31. mai i år, og som ikkje var påtaleavgjort per 1. august. Det blir understreka i rapporten at nokre av sakene ligg lenger tilbake i tid.
- Typiske manglar var foto av åstad og rusprøvar, manglande sikring av bevis og manglande avhøyr i ein tidleg fase, heiter det i rapporten.
Sørvest politidistrikt kunne ikkje kommentere rapporten tysdag.
(©NPK)
Illustrasjonsfoto: Gorm Kallestad / NTB scanpix