Råsterk Thingnes Bø med den første verdscupsigeren sin som far

Johannes Thingnes Bø viste at både langrenns- og skyteforma er like god som ho var før jul. Med fire fulle hus leidde han med ti sekund på sin argaste rival då dei fire skytingane var unnagjorde. Fourcade gav alt på sisterunden, men klarte ikkje å ta att forspranget.

Det klarte heller ingen andre i Pokljuka. Thingnes Bø vann med det den 44. verdscupsigeren sin.

– Ti sekund er frykteleg lite på ein 20-kilometer. Det var den «pappaboosten» som tok meg ti sekund føre, slo Thingnes Bø fast overfor NRK etter løpet.

I mål var nordmannen 11,4 sekund føre Fourcade, som også trefte på alle 20 blinkane. Franskmannen tapte mange sekund då han fekk vanskar på veg ut frå andre skyting. Først fekk han ikkje tak i staven etter skyting, og like etter fall då han då han hekta seg i sin eigen stav.

Thingnes Bø fortalde at han måtte justere på tempoet i løpet etter å ha hatt ei dårleg innskyting.

– Det betyr veldig masse. Eg sleit litt på dei to første rundane i dag, og kom ikkje heilt i det. Men til sjuande og siste vart det eit bra «taima» løp, seier Thingnes Bø.

– Han er heilt rå. Heilt unik, sa broren Tarjei. Han vart nummer seks.

Johannes Thingnes Bø vart far i midten av januar og har ikkje konkurrert i verdscupen etter jul. I fråværet til stryningen har Fourcade nytta høvet til å gå til topps i verdscupen. Han har vist imponerande form, både i sporet og på standplass.

Johannes Dale gjekk eit særs godt løp og trefte på 19 av 20 blinkar. Han gjekk 24 sekund raskare enn Thingnes Bø i sporet, men det vart ikkje pallen etter den eine bommen. Dale vart nummer fem.

Quentin Fillon Maillet hadde suverent beste langrennstid, men med to bom kunne han ikkje hamle opp med dei beste. Franskmannen enda på 7.-plass, plassen føre Tarjei Bø. Han bomma ein på siste skyting og vart nummer seks.

(©NPK)

Johannes Thingnes Bø og franske Martin Fourcade kjempa om sigeren i Pokljuka i Slovenia torsdag. Thingnes Bø trekte det lengste strået. Biletet er frå Östersund før jul. Foto: Fredrik Sandberg/TT NYHETSBYRÅN / NTB scanpix