Regjeringa krev merking av israelske busetjarprodukt
Regjeringa har vedteke at varer produsert i Israels ulovlege busetjingar på Vestbreidda og Golanhøydene frå no av skal merkast tydeleg med opphavsstad.
Israelske busetjarprodukt har tidlegare vore merkt med Israel som opphavsland, men frå no av må det komme fram av merkinga at produkta kjem frå busetjingar som er oppretta i strid med folkeretten.
Utanriksdepartementet viser til EU-domstolens avgjerd frå november 2019 der det blir slått fast at israelske produkt frå okkuperte område må merkast særskilt slik at forbrukarane ikkje blir villeidde.
Vin, frukt og grønsaker
– Næringsmiddel med opphav i område okkupert av Israel skal merkast med noko som område produktet kjem frå, og at det kjem frå ei israelsk busetjing dersom det er tilfelle. Det er særleg vin, olivenolje, frukt, grønsaker og poteter som kjem frå dei aktuelle områda, heiter det i ei pressemelding frå UD.
I tråd med resolusjonar frå FNs tryggingsråd og vurderingar frå Den internasjonale domstolen i Haag, er Noregs haldning at «Israel» og «israelsk territorium» omfattar territoriet som var underlagt israelsk kontroll før 4. juni 1967, heiter det vidare.
Denne territorielle avgrensinga av staten Israel er også lagt til grunn for forståinga av det geografiske bruksområdet for Eftas frihandelsavtale med Israel.
Ikkje boikott
– Norske forbrukarar har rett til å vite om eit næringsmiddel som blir selt i Noreg er produsert i Israel eller i eit område okkupert av Israel, seier utanriksminister Anniken Huitfeldt (Ap) i ein e-post sendt til NTB.
– Dette er på ingen måte snakk om ein boikott av Israel. Vi meiner at boikott er feil politikk. Noreg har eit godt forhold til Israel. Det skal vi framleis ha, understrekar ho.
Huitfeldt viser også til at mange EU-land, blant dei Danmark, Sverige og Finland, alt har innført tilsvarande krav om særskild merking av produkt frå busetjingar.
Ulovlege
Israel har sidan 1967 etablert rundt 270 busetjingar og såkalla utpostar på Vestbreidda og vel 30 busetjingar på dei syriske Golanhøydene.
Busetjingane husar i dag rundt 700.000 israelarar, men er oppretta i strid med den fjerde Genèvekonvensjonen som slår fast at okkupantmakter ikkje kan flytte delar av si eiga befolkning til områda som blir okkuperte.
FNs tryggingsråd har også slått fast at busetjingane er ulovlege.
(©NPK)
Israel har i strid med folkeretten oppretta rundt 270 bosetninger og såkalla utpostar på Vestbreidda og drygt 30 bosetninger på de syriske Golanhøydene. Foto: AP / NTB
