Regjeringskaos i Ecuador etter store demonstrasjonar
Tysdag vedtok fire regjeringsmedlemmer i Ecuador å forlate ministerpostane sine. Bakteppet er store demonstrasjonar mot auka levekostnader.
Det var Ecuadors finansminister Simen Cueva, helseminister Ximena Garzon, samferdsels- og arbeidsminister Marcelo Cabrera og utdanningsminister Alejandro Ribadeneira som tysdag leverte inn oppseiingane sine til president Guillermo Lasso.
Det skjer kort tid etter at regjeringa førre veke inngjekk ein avtale med urfolksgrupper for å få ein slutt på demonstrasjonane og gatekampane som herja i Ecuador i fleire veker.
Urfolksgrupper stod bak demonstrasjonane og årsaka til misnøya var mellom anna tøffe levekår, som delvis er eit resultat av koronapandemien som ramma Ecuador spesielt hardt. Seks personar døydde, og fleire titals demonstrantar og politifolk vart skadde i kampane.
Tiltaka regjeringa no har innført inneber mellom anna lågare drivstoffprisar og pengestøtte til dei fattigaste. Det er anslått at tiltaka vil koste 700 millionar kroner årleg.
Sentralbanken i landet sa tysdag at demonstrasjonane har kosta landet minst éin milliard amerikanske dollar.
(©NPK)
I fleire veker herja demonstrantar i Ecuadors gater. Foto: Dolores Ochoa / AP / NTB
