Rektor ved Bergensskule sparka etter mangelfull handtering av overgrepsvarsel
Ein rektor i Bergen er sparka av kommunen for å ikkje å ha gått vidare med varsel mot ein SFO-tilsett, som no er sikta for overgrep mot barn ved to skular.
Den SFO-tilsette vart arrestert i desember i fjor, og den 30. juni vart siktinga mot vedkommande utvida til å gjelde tre tilfelle av valdtekt av barn under 14 år, og dessutan åtte tilfelle av seksuell handling mot barn.
Rektoren på ein av skulane der den SFO-tilsette jobba, fekk ei bekymringsmelding om den sikta allereie i mai i fjor. Varsla omfatta handlingar mot to elevar som «omfattes av straffelovens bestemmelser om voldtekt eller seksuelt krenkende atferd overfor barn under 14 år», ifølgje eit dokument Bergens Tidende har fått tilgang til.
Dokumentet er eit referat frå eit drøftingsmøte Bergen kommune hadde med den aktuelle rektoren i januar i år. Av referatet går det fram at skuleleiaren ikkje gjekk vidare til verken politi eller sine næraste leiarar med varsla mot den SFO-tilsette. Dermed skjedde det ikkje noko rundt den SFO-tilsette før desember i fjor, då tre elevar ved skulen gjekk til helsesøster for å fortelje om mannen. Ho varsla omgåande politiet.
I drøftingsmøte-referatet slår kommunen fast at den mangelfulle oppfølginga til rektoren av varsla utgjorde eit «grovt tillitsbrudd». Rektoren vart oppsagd 17. januar.
«Det er videre overveiende sannsynlig at din håndtering av bekymringsmeldingen har ført til at elever ved annen skole i Bergen kommune er blitt utsatt for overgrep av den samme ansatte», skriv kommunen i referatet ifølgje Bergens Tidende.
(©NPK)
