Nordre

Remdesivir-behandling vil koste over 22.700 kroner

Å behandle alvorleg sjuke koronapasientar med legemiddelet Remdesivir, vil koste om lag 22.700 kroner per behandling.

Det opplyser det amerikanske legemiddelfirmaet Gilead Sciences, som måndag kunngjorde prisen per dose av legemiddelet Remdesivir.

Ein dose kostar 390 dollar, eller om lag 3.786 kroner. Og det trengst seks dosar av medisinen til éi behandling. Det vil seie om lag 22.720 kroner.

Gilead har sett ein fast pris på Remdesivir for ressurssterke, utvikla land i staden for å forhandle einskildvis med eitt og eitt land. Hensikta er å raskt sikre tilgang til legemiddelet, opplyser direktøren i selskapet Daniel O'Day.

Legemiddelet er ein såkalla «viral RNA polymerase hemmar» som verkar ved å hemme formeiringa av viruset. Det har vist effekt på mellom anna på koronaviruset SARS-CoV-2 som forårsakar covid-19.

Bruk av Remdesivir forkortar i gjennomsnitt sjukdomsforløpet med fire dagar, frå 15 til 11 dagar, samanlikna med placebo.

Dei europeiske legemiddelstyresmaktene tilrår ei godkjenning på vilkår til Remdesivir for behandling av koronaviruset.

– Remdesivir er for tida eitt av dei mest lovande legemidla til behandling av covid-19, sa overlege Sigurd Hortemo ved Statens legemiddelverk til NTB førre veke.

Tidlegare i år fekk Remdesivir ei nødgodkjenning til bruk mot covid-19 i USA, Storbritannia og Japan.

(©NPK)

Den amerikanske legemiddelprodusenten Gilead produserer Remdesivir, som kan bli brukt til å behandle covid-19. Foto: AP / NTB scanpix

ANNONSE
Annonse
ANNONSE
Annonse