Røiseland missa pallen med 3,1 sekund

Marte Olsbu Røiseland var berre 3,1 sekund unna eit nytt palløp. Italienske Lisa Vittozzi vann verdscupsprinten på torsdag i tyske Oberhof.

Det vart den første verdscupsigeren til Lisa Vittozzi. Franske Anaïs Chevalier tok andreplassen, 5,3 sekund bak.

Røiseland enda på den sure fjerdeplassen, men ho hadde berre 3,1 sekund opp til svenske Hanna Öberg.

Kontrollert

Marte Olsbu Røiseland hadde ei kontrollert opning og var feilfri på standplass på liggjande skyting, men brukte litt lang tid på å få ned blinkane. Ho var 14,8 sekund bak leiande Vittozzi.

På ståande skyting lukta Røiseland sin tredje verdscupsiger, men Frolandsløparen måte tole ein tur i strafferunden etter å ha bomma på det siste skotet. Ho gjekk ut 30 sekund bak Vittozzi ut frå skytinga, men i mål skilde det berre 18,1 sekund mellom dei to. Den norske løparen var desidert raskast på sisterunden.

På eit seinare startnummer kom svenske Öberg og skaut feilfritt. Ho gjekk ut i god avstand til den norske løparen, men tapte òg stort på sisterunden, men ikkje nok til å sjå seg slått.

Opptur

Ingrid L. Tandrevold fekk ein liten opptur med å bli nest beste norske løpar med ein 14.-plass. Ho hadde ein strafferunde etter liggjande skyting, men banka ned alle blinkane på ståande.

Ho enda 49,1 sekund bak vinnaren i mål.

Tiril Eckhoff opna som vanleg bra, men var ikkje blant dei aller raskaste inn til første skyting. Der pådrog ho seg ein bom på det siste skotet. På ståande skyting måtte ho ut i to strafferundar. Ho var til slutt 1.27,8 minutt bak vinnaren i mål på 33.-plass.

Karoline O. Knotten vart nummer 50 - 1.59,5 (1-1) bak, mens Thekla Brun-Lie enda på 58.-plass.

Emilie Å. Kalkenberg skaut ein bom på kvar av skytingane og enda 2.14,3 minutt bak. Ho var ei plassering unna å komme blant dei 60 som får gå jaktstarten på laurdag.

(©NPK)

Marte Olsbu Røiseland leverte ein ny solid sprint i tyske Oberhof torsdag. Foto: Petr David Josek / AP / NTB scanpix

ANNONSE
Annonse
ANNONSE
Annonse