Russisk etappesiger i Giro d'Italia, Polanc held på leiartrøya
Ilnur Zakarin frå Russland vann den tøffe 13.-etappen i Giro d'Italia fredag. I kampen om samanlagtsigeren spissar det seg til i teten.
Zakarin var i brot store delar av etappen, og på dei siste kilometrane sat han i teten med Mikael Nieve og Bauke Mollema. Russaren rykte frå i avslutninga og vann den tøffe fjelletappen 35 sekund føre Nieve.
Slovenaren Jan Polanc leier framleis rittet samanlagt, men fredag mista han store delar av forspranget sitt til samanlagtkanonane som jagar bak. Han er no 2 minutt og 25 sekund føre landsmannen Primoz Roglic, medan etappevinnar Zakarain køyrde seg opp til tredjeplassen. Han er 31 sekund bak andreplassen.
Roglic blir rekna som ein av dei største favorittane til å vinne Giro d'Italia samanlagt og har no eit flott utgangspunkt.
Fredag vart det ein ny duell mellom han og italienaren Vincenzo Nibali. Sistnemnde har vore kritisk til slovenaren og sagt at han er for defensiv, men klarte aldri å rykke ifrå Roglic i dei siste bakkane.
Nibali er nummer fem i samandraget, vel fire minutt bak leiaren Polanc, og 1.44 minutt bak Roglic.
Laurdag ventar endå ein knalltøff klatreetappe for ryttarane. Ingen nordmenn deltar i Giroen i år. Målgangen er 2. juni i Verona.
(©NPK)
Jan Polanc leier framleis samandraget i Italia, men tapte tid fredag. Foto: Alessandro Di Meo / AP / NTB scanpix.
