Viruskaos blant skiskyttarane – positive testar hos fem nasjonar
Det er påvist koronasmitte hos fem skiskyttarnasjonar føre verdscupopninga i Finland kommande helg. Den russiske leiren er mellom anna ramma.
Det opplyser Det internasjonale skiskyttarforbundet (IBU).
Alle utøvarar og støtteapparata deira skal gjennom omfattande testing i forkant av opningsrenna i Kontiolahti. Den første testrunden har så langt enda med positive prøver hos fem nasjonar.
Onsdag kveld stadfesta IBU at laga frå Russland, Latvia og Moldova er ramma. Torsdag blir det opplyst at ytterlegare testar har gitt positive prøvar òg i den franske og rumenske leiren.
«Dei aktuelle personane er underretta og isolerte», skriv IBU.
– Det skal kanskje godt gjerast at det ikkje blir nokon positive testar i det heile med så mange folk. Det viser at det er viktig med testing på plassen ein kjem til, seier Noregs landslagssjef Per-Arne Botnan til NTB.
Botnan seier at alle i den norske troppen er friske og raske, og at det ikkje er registrert smitte. Alle tok ein ny test torsdag morgon i tillegg til testen som vart teken onsdag.
– Vi får håpe at vi er innanfor. Vi har i alle fall gjort det vi kan i forkant og på reise, seier han.
Botnan seier vidare at han ikkje har høyrt noko anna enn at det blir renn.
Babikov testa positivt
Det internasjonale forbundet opplyser vidare at det er konkludert med at smittesituasjonen i Frankrike ikkje utløyser noka form for karantene.
Vidare heiter det at finske helsestyresmakter er informerte om situasjonen, og at dei vil vedta kva som skal skje vidare i saka.
Det russiske skiskyttarforbundet stadfestar på Instagram-kontoen sin at profilen Anton Babikov og tre medlemmer av det medisinske apparatet har testa positivt på koronaviruset.
Heile den russiske troppen skal vere isolert på hotellet sitt.
Sa nei til Sverige
IBU opplyser at i tilfelle der det blir påvist smitte i troppen eller blant støtteapparatet til ein skiskyttarnasjon, blir aktuelle personar umiddelbart sett i isolasjon.
Deretter overtek nasjonale styresmakter den vidare handteringa. Det er såleis ikkje det internasjonale forbundet som vedtek kva for nokre praktiske konsekvensar ein positiv test vil få for utøvarane og laga.
I samband med verdscuprenna i alpint i finske Levi sist helg hamna det svenske kvinnelandslaget i karantene som følgje av påvist koronasmitte hos ein lagleiar. Svenskane håpa likevel å stille utøvarane til start, men finske styresmakter sa nei.
(©NPK)
Anton Babikov har gitt frå seg positiv koronatest. Foto: Heiko Junge / NTB
