Sagosen skaut sund Ungarn – Noreg vidare til kamp om 5.-plassen

Tyskarane slo Egypt 35–34 etter ekstraomgangar tidlegare fredag.

– Eg er fornøgd med gjennomføringa. Eg synest vi gjer det proft og står saman som ei gruppe, sa Sagosen til Viaplay.

Handballstjerna speler til dagleg i Kiel og er klar på at det er viktig å kunne reise heim til Tyskland med siger etter oppgjeret søndag.

– Det blir mykje prestisje, slik det var i førre kamp. Det er ingen som har lyst til å reise heim til klubbane sine og vere det dårlegaste landslaget, sa Sagosen.

Ungarn fekk ein brutal start på kampen då Miklos Rosta skaut Torbjørn Bergerud i hovudet på ei straffe, berre eitt minutt inn i kampen. Det førte direkte til raudt kort frå dei franske dommarane.

Sander Sagosen svara med å skåre det første målet i kampen og sende Noreg i ei leiing dei aldri seinare gav frå seg. Til pause leidde raudtrøyene 16–13.

Sagosen-magi

Etter kvilen knepte ungararane innpå til 19-18, men med ei god avslutning sikra dei norske handballherrane ein overlegen 33-25-siger.

Sagosen vart toppskåraren i kampen med sju mål på dei åtte skotforsøka sine. Máté Lékai skåra seks for Ungarn.

Sagosen noterte seg også for sju målgivande pasningar og vart kåra til den beste spelaren til banen.

– Det er alltid artig å spele bra handball. Men det er feil kamp vi speler bra, det skulle heller vore for to dagar sidan, sa Sagosen.

Bittert tap

Noreg tapte onsdag kvartfinaledramaet mot Spania etter doble ekstraomgangar og måtte dermed ut i «taparsluttspel».

– Eg synest det er ei ekstremt fin innstilling i laget. Eg er imponert over korleis dei har klart å omstille, sa landslagssjef Jonas Wille til Viaplay.

– Vi står saman som eit lag i både oppturar og nedturar, men dette kjem til å sitje i ei stund. Hjartet kjem til å blø i lang tid, la Sagosen til.

Samtidig sikra også dei danske handballherrane finaleplass då dei vann semifinalen mot Spania.

(©NPK)

Sander Sagosen vart toppskåraren i kampen mot Ungarn. Foto: Stian Lysberg Solum / NTB / NPK