Salah om Liverpool-framtida: – Ville elska å bli verande resten av karrieren
Mohamed Salah glitrar for Liverpool, men ei kontraktsforlenging lèt vente på seg. Hans siste ytringar vil derimot gle fansen.
Egyptaren har i haust knalla til med tolv mål på elleve klubbkampar. Fleire av skåringane har vore av det utsøkte slaget. Salah er høgt verdsett på Anfield, men spekulasjonar om framtida er ikkje til å unngå når han har under to år igjen av avtalen med Liverpool.
Sjølv tek han situasjonen med ro. 29-åringen gir fansen tryggjande kommentarar før storoppgjeret på søndag mot Manchester United.
– Viss du spør meg, ville eg elska å bli verande her til min siste dag av karrieren. Det er ikkje så mykje meir å seie enn det, for det er ikkje i hendene mine. Alt avheng av kva klubben vil, seier Salah til Sky Sports.
Han har tidlegare vorte kopla til Real Madrid, men Salah slit med tanken om å måtte spele mot Liverpool.
– Det ville gjort meg trist. Eg ønskjer ikkje å snakke om det eingong,
Salah har vore i Liverpool sidan 2017. Han står med 137 mål på 214 kampar.
(©NPK)
Mohamed Salah jublar med Sadio Mané i ein meisterligakamp for Liverpool. Foto: Luis Vieira / AP / NTB
