Salmar og Lerøy har permittert færre enn frykta

I Lerøy er 60 prosent av dei 339 tilsette som fekk permisjonsvarsel, framleis i jobb. I Salmar fekk 851 tilsette varsel om permitteringar.

– Ingen av våre tilsette på Senja er permitterte, medan rundt 50 prosent av alle på fabrikken på Frøya er permitterte, seier konsernsjef Frode Arntsen i Salmar til Dagens Næringsliv.

Det var i haust at ei rekkje lakseselskap varsla at dei ville permittere tilsette frå nyttår. Grunnen var eit bortfall av kontraktsmarknaden som følgje av forslaget om grunnrenteskatt, opplyste dei.

Ifølgje Lerøy er situasjonen framover framleis usikker.

– Situasjonen endrar seg frå veke til veke, og uvissa for korleis utviklinga blir framover er dessverre framleis stor, seier kommunikasjonssjef Aina Valland til avisa.

(©NPK)