Samanstøyt mellom israelsk politi og palestinarar

Israelsk politi tok i bruk sjokkgranatar og ein vasskanon for å spreie palestinarar som samla seg i gamlebyen i Jerusalem til ramadan, ifølgje israelske medium.

Slike samanstøytar mellom politi og hundrevis av palestinarar har funne stad kvar kveld sidan ramadan starta førre veke.

Palestinarane seier at dei i fleire år har pleidd å samlast på trappene ved Damaskusporten kvar kveld etter fasta, men i år sette israelsk politi opp sperringar for å halde dei borte.

Politiet på si side skuldar palestinarane ved porten for å kaste stein. Minst tre palestinarar er arresterte, og Røde Halvmåne melder at fire er skadde.

Israelsk politi melder om liknande samanstøytar i Jaffa, i utkanten av Tel Aviv, der tre palestinarar vart arresterte og to politimenn lettare skadd.

(©NPK)

Annonse
Annonse