Samferdselsministeren varslar gjennomgang av jernbanesektoren

I ei pressemelding frå Samferdselsdepartementet er det varsla tre løp i gjennomgangen av jernbanesektoren etter sommaren.

Dei tre løpa er ei ekstern kartlegging av utfordringar, ein gjennomgang av selskapsstrukturen og ei vidareutvikling av Samferdselsdepartementets styring av jernbanesektoren.

Den eksterne kartlegginga skal ta for seg utfordringar i arbeidsdelinga mellom Samferdselsdepartementet, Jernbanedirektoratet og Bane Nor. I gjennomgangen av selskapsstrukturen skal dei statlege selskapa som driv med drift og vedlikehald av infrastruktur sjåast nærare på. Gjennomgangen av Samferdselsdepartementets styring av jernbanesektoren skal mellom anna lage eit avgjerdsgrunnlag inn mot neste Nasjonal transportplan.

Samferdselsminister, Jon-Ivar Nygård (Ap), fortel at regjeringa har store ambisjonar for norsk jernbane, og at dei har eit mål om fleire reisande og meir gods på bane.

– Derfor går vi no, i tråd med Hurdalsplattforma, i gang med ein grundig gjennomgang av organisering og selskapsstruktur i sektoren. Regjeringa har allereie stansa vidare konkurranseutsetjing av persontransport og drift og vedlikehald på jernbanen, men det er framleis mykje å ta tak i etter store endringar i jernbanesektoren dei siste åra, seier Nygård.

(©NPK)

Samferdselsminister Jon-Ivar Nygård varslar ein omfattande gjennomgang av jernbanesektoren. Foto: Alf Simensen / NTB