Seks mistenkelege pakker sende til offisielle adresser i USA

Seks pakker med det som truleg er eksplosiv, er funne på forskjellige adresser knytt til amerikanske styresmakter og militære i Washington.

Både FBI og det amerikanske militæret bekreftar at dei etterforskar funnet av seks mistenkelege pakker som inneheldt det som synest å vere eksplosiv, ifølgje NBC News. Pakkene vart sende til forskjellige adresser knytt til amerikansk etterretning og militære.

- 26. mars rykte FBI ut til fleire regjeringsfasilitetar etter meldingar om mistenkelege pakker. Kvar pakke vart tatt med til vidare analysar av FBI, melde FBI på Twitter.

Den første pakka vart funnen måndag morgon ved forsvarsuniversitetet i hovudstaden, ifølgje NBC.

Andre pakker vart funne ved postmottak for CIA, Det kvite hus og den amerikanske marinen. Nokre av pakkene inneheldt brev som tenestemenn beskriv som forstyrrande og surrete, ifølgje kanalen.

FBI etterforskar om alle pakkene har same avsendar, og om det er snakk om ekte eksplosiv eller om det er etterlikningar.

(©NPK)

Annonse