Shiffrin: - Åre fortener ikkje å vere OL-bakke
Alpindronninga Mikaela Shiffrin er langt frå imponert over løypa hos VM-arrangør Åre.
Sverige skal søke vinter-OL i 2026 med Åre som vertsstad for dei alpine øvingane. Det synest Shiffrin er ein dårleg idé.
I VM har starten vorte flytta ned i seks av åtte konkurransar på grunn av snø, skodde og kraftig vind.
- Om det er slike forhold for ofte så synest eg ikkje at ein skal køyre OL her. Det fortener ikkje å vere ei OL-bakke. Du ønsker ikkje å vere nøydt til å køyre frå reservestarten, seier Shiffrin.
Amerikanaren står med to medaljar så langt i VM (gull i super-G, bronse i storslalåm) og er favoritt før slalåmrennet på laurdag. Fråsegnene hennar møter motstand hos presidenten i Det internasjonale skiforbundet (FIS), Gian Franco Kasper, som meiner at alpinbakkane i Åre er av toppklasse.
Roser OL-kandidatane
- Det er eit luksusproblem for oss. Begge stadene har mykje erfaring med verdscup i alle disiplinar, seier han om dei moglege OL-arrangørane Åre og italienske Cortina/Bormio.
Kasper seier at vêrutfordringane i VM i år trass alt ikkje har gjort at mange outsiderar har vunne konkurransane.
- Om ein mexicanar vinn utfor, ville det ikkje vore den beste reklamen for skisporten. Men vi er utandørs, og vi må jobbe for å takle vêret. Det finst enkelt og greitt ikkje noko 100 prosent rettferdig verdsmeisterskap, seier FIS-toppen i eit intervju med DPA.
(©NPK)
Mikaela Shiffrin er ikkje imponert over Åre som meisterskapsarrangør. Foto: Marco Trovati / AP / NTB scanpix