Siemens satsar på hydrogentog
Den tyske industrigiganten Siemens går saman med togselskapet Deutsche Bahn i ei satsing på tog drive av brenselceller som forbrenn hydrogen.
Det nye toget skal testast i 2024, og planen er å erstatte tyske lokaltog som går på diesel, melder Reuters. Rundt 40 prosent av det tyske jernbanenettet er ikkje elektrifisert, og dermed blir dieseltog brukt i stor utstrekning.
– Vi ser eit marknadspotensial på 10.000 til 15.000 tog i Europa som skal erstattast dei næraste 10–15 åra. Berre i Tyskland er det snakk om rundt 3.000, seier toppsjef Michael Peter i Siemens Mobility.
Prototypen skal drivast av brenselceller som genererer straum ved hjelp av hydrogen og oksygen. Toget skal òg kunne drivast av batteri eller via straumleidningar, avhengig av kvar det blir brukt.
Framstilling av hydrogengass krev mykje energi, som kan komme frå fossile eller fornybare kjelder. Når gassen blir forbrunnen, blir det danna vatn og varme.
Det nye toget skal kunne tankast på 15 minutt og ha ei rekkjevidd på 600 kilometer og ein toppfart på 160 kilometer i timen. Testinga skal skje utanfor Stuttgart.
Frå før går det hydrogendrivne tog bygde av franske Alstom nordaust i Tyskland. I Japan kunngjorde Toyota, Hitachi og jernbaneselskapet JR East nyleg at dei saman skal utvikle hydrogentog.
(©NPK)
