Siv Jensen: Vurderte å melde inn hytteleige til stortingsregister
Finansminister Siv Jensen seier ho vurderte å melde inn avtalen om hytteleige med Johan H. Andresen, men kom fram til at han ikkje blir ramma av regelverket.
Fredag sende Finansdepartementet svar frå Siv Jensen til Stortinget om hytta ho leiger avJohan H. Andresen. Jensen betaler 40.000 kroner i året for å leige ei hytte med eiga brygge og badehus på Grimsøya i Oslofjorden. Andresen har hytte ved sida av, skriv Dagens Næringsliv.
I svaret fortel finansministeren om vurderingane ho gjorde før avtalen vart inngått i fjor.
«Jeg har selvsagt også vurdert Stortingets register for verv og andre økonomiske interesser, men kan ikke se at regelverket omfatter ordinære leieforhold for fritidsboliger», skriv ho.
I dette registeret har finansministeren meldt inn at ho har fått ei flaske whisky av Stortingets presselosje. Statsministerens kontor vart orientert i fjor.
«Det gjorde jeg for å klargjøre eventuelle fremtidige habilitetsspørsmål. Om det i fremtiden vil oppstå habilitetsspørsmål fordi jeg som privatperson leier en hytte av Johan Andresen, vil avhenge av eventuelle konkrete saker som departementet vil få til behandling», skriv Jensen.
Leigeavtalen vart inngått på forsommaren 2017 og gjeld for ti år.
Siv Jensen utnemnde i 2014 Johan H. Andresen til leiar av Etikkrådet for oljefondet.
- Bruken av hytta bygger på eit regulært, privat leigeforhold. Eg har ikkje teke imot ei gåve eller teneste eller anna form for yting, skriv Jensen i svaret.
(©NPK)
Finansminister Siv Jensen seier ho meiner bruken av hytta bygger på eit regulært, privat leigeforhold. - Eg har ikkje tatt imot ei gåve eller teneste eller anna form for yting, seier ho. Foto: Cornelius Poppe / NTB scanpix
