Sjögren om kvinnelandslaget: – Eit lag med lys framtid
Noreg imponerte ikkje då Wales vart slått tysdag, men billetten til EM-sluttspelet er nesten i boks. Martin Sjögren er sikker på at laget vil slå godt frå seg.
– Framtida er lys for dette laget. I fjorårets VM var vi femte yngste lag. Vi har allereie vore gjennom eit generasjonsskifte, men det kjem nye og spennande spelarar opp. Vi har mange spelarar fødde på 1990-talet som vil vere i bra alder til EM i 2022 og VM året etter, seier landslagssjefen.
– Vi skal halde fram med å jobbe for å bli betre, men det byrjar å bli tøff konkurranse om plassane. Det er ikkje lett å komme inn på dette laget.
Det er eit lag med verdsklassespelarar som Caroline Graham Hansen og Guro Reiten, som er blant dei største profilane i to av dei største ligaene i verda, talent med framtida føre seg og sterke spelarar med masse rutine.
Maren Mjelde, Elise Thorsnes og Ingrid Moe Wold var alle jubilantar tysdag. Dei runda høvesvis 150, 125 og 75 landskampar.
Vår eiga skuld
I den første landskampen på over eit halvt år sleit Noreg med å få pasningsspelet til å gli. Det vart færre sjansar enn vanleg, og ein kontringsvillig motstandar fekk gunstige brot som kunne ha påført Noreg kvalifiseringas første poengtap.
– Det er sterkt å vinne når vi er så langt frå det vanlege nivået. Vi visste at Wales var den tøffaste motstandaren i kvalifiseringa. Det fekk vi òg erfare, men det var vår eiga skuld at kampen vart spennande så lenge. Vi burde ha kontrollert den betre, og særleg det siste kvarteret, synest Sjögren.
– Vi må hugse at vi ikkje hadde spelt saman på seks månader, og vi hadde ei snau veke med trening før kampen. Det påverka rytmen. Hadde vi møtt Wales like etter Algarve Cup, slik det var meininga, ville det vore annleis, meiner Caroline Graham Hansen.
653 dagar
– Vi var ikkje på vårt beste, medan Wales gjekk ut for å krige og øydeleggje. Dei gjorde det vanskeleg for oss. Hadde vi fått 2-0-målet som vi fortente, så trur eg vi ville fått nummer tre og fire òg. I staden sleit vi med å ro det i land.
Noreg er eitt av åtte lag utan poengtap i EM-kvalifiseringa så langt. EM-billetten vil vere i boks om det blir siger over Kviterussland 21. oktober. Det er eit lag Noreg slo 7–1 på bortebane i fjor. Seks dagar seinare er det bortekamp mot Wales, og om nødvendig kjem ein ny matchball heime mot Færøyane 26. november.
Sjögrens utfordring er ikkje å sikre EM-billetten, men å utvikle laget i tida fram mot avspark i sluttspelet. Tysdag var det 653 dagar igjen.
(©NPK)
Norges kvinnelandslag feirar Guro Reitens vinnarmål i EM-kvalifiseringskampen mot Wales. 653 dagar før første kamp i sluttspelet sikra Noreg i praksis EM-billetten. Foto: Håkon Mosvold Larsen / NTB
Eit lag med lys framtid, seier Martin Sjögren (til h.) om Noregs kvinnelandslag. Her gir han instruksar til Caroline Graham Hansen, Ingrid Moe Wold, Maria Thorisdottir og Maren Mjelde under kampen mot Wales. Foto: Jil Yngland / NTB
Caroline Graham Hansen og Norge makta ikkje å komme opp på vanleg nivå i EM-kvalifiseringskampen mot Wales, men landslagssjef Martin Sjögren meiner det er eit lag med lys framtid. Foto: Håkon Mosvold Larsen / NTB
