Sjølvmordsbomber spreier død og kaos under religiøs samling i Kabul

Over 40 menneske vart drepe i eit sjølvmordsåtak i Kabul tysdag, det dødelegaste sjølvmordsåtaket i den afghanske hovudstaden på fleire månader.

Åtaket var retta mot ei stor gruppe skriftlærde og religiøse leiarar som feira fødselsdagen til profeten Muhammed.

Ifølgje helsedepartementet vart minst 43 drepe og over 80 såra. Tilstanden er kritisk for 24 av dei såra, og talet på døde vil truleg stige.

- Sjølvmordsbombaren sprengde seg i lufta under ein seremoni med religiøse skriftlærde, seier polititalsmann Bashir Mujahid, som stadfestar talet på døde og såra.

- Over 1.000 til stades

Augevitne seier det var over tusen menneske i selskapslokalet som vart ramma, fortel afghanske Tolo News.

Det er førebels ikkje kjent kven som står bak åtaket.

Det har vore ei rekke åtak i den afghanske hovudstaden den siste tida. I september vart 26 menneske drepe i eit åtak på ein bryteklubb. Det var òg ei rekke åtak over heile landet i samband med parlamentsvalet, og fleire hundre vart drepe eller såra i samband med dette.

Fredssamtalar

Òg i juni vart ei gruppe med religiøse leiarar angripne i Kabul og minst sju menneske vart drepe. Då tok ekstremistgruppa IS på seg ansvaret. Forsamlinga som vart ramma, hadde komme med ei fråsegn om at sjølvmordsåtak var synd og oppfordra til fredssamtalar.

I førre veke var utsendingar for Taliban-bevegelsen og USA samla til samtalar i Qatar. Den amerikanske spesialutsendingen Zalmay Khalilzad har sagt han har håp om ein fredsavtale med Taliban før presidentvalet i april neste år.

(©NPK)

Ein såra mann blir teken imot på eit sjukehus i Kabul etter eit sjølvmordsangrep tysdag ettermiddag. Foto: AP / Rahmat Gul / NTB scanpix

Annonse
Annonse