Nordre

Sju omkom i uvêr i Hellas

Sju personar, blant dei seks turistar, døydde under eit uvêr i det nordlege Hellas onsdag kveld. Over 60 andre vart skadde, opplyser styresmaktene torsdag.

Det kraftige uvêret ramma Halkidiki nord i Hellas onsdag kveld. Uvêret varte i berre ti minutt, men gjorde stor skade på den korte tida. Tre vart rivne opp med røtene, bilar og motorsyklar vart kasta rundt, og tusenvis av menneske stod utan vatn, straum og tilgang til mobilnett.

Eit tsjekkisk par døydde då kraftig vind kasta rundt campingbilen deira i Sozopoli. Han hamna på taket, og eigedelar låg strødd utover stranda. I Nea Plagia lenger aust døde ei rumensk kvinne og sonen hennar då delar av ein restaurant-skjerming dei hadde søkt tilflukt under, kollapsa. Barnet vart tatt av vinden og kasta rundt, ifølgje augnevitne.

Lenger søraust, i Nea Potidea, døydde ein russisk turist og den to år gamle sonen hans då eit tre fall over dei.

Den sjuande omkomne var ein lokal fiskar i 60-åra.

Fire femdelar av Halkidiki-regionen, som ligg nær storbyen Thessaloniki, stod utan elektrisitet etter uvêret. Først torsdag kveld var det venta at straumforsyninga ville vere retta opp igjen.

Soldatar hadde vorte sendt ut med mobile straumgeneratorar, og dessutan utstyr til å rydde opp etter uvêret. Regjeringa har sett av øyremerka middel, opplyste talsmann Stelios Petsas torsdag.

Greske meteorologar opplyser at uvêret var eit fenomen som vanlegvis berre finn stad til sjøs. Det var sendt ut åtvaring om at uvêret kunne slå til, etter fleire samanhengande dagar med sterk varme.

(©NPK)

Oppryddingsarbeidet var i gang i Sozopoli torsdag. Foto: AP / NTB scanpix

Uvêret gjorde store skadar. Torsdag var oppryddingsarbeidet i gang. Foto: AP / NTB scanpix

Eit turistpar frå Tsjekkia døydde då campingbilen deira vart kasta rundt i uvêret. Foto: AP / NTB scanpix

Ein bensinstasjon vart øydelagt i uvêr i Nea Potidea. Foto: AP / NTB scanpix

ANNONSE
Annonse