Sjukehuset Innlandet skal varsle 25 pasientar og fleire tilsette etter dataangrep
Dataangrepet mot Sjukehuset Innlandet i august er kartlagd og analysert. Helseføretaket opplyser at 25 pasientar og fleire tilsette skal varslast.
Analysen som er gjennomført av Sykehuspartner HF og Sjukehuset Innlandet, viser at den ramma databasen ved ein feil inneheldt sensitive personopplysningar frå Sjukehuset Innlandets kvalitetssystem.
Dette er eit system der tilsette melder frå om uønskte hendingar innanfor pasientbehandling, helse, miljø og tryggleik på arbeidsplassen.
Frå dette systemet er det henta ut data registrert i perioden november 2016 til februar 2020, og det er avdekt nokre tilfelle der det er mogleg å kople sensitive opplysningar til personar.
25 pasientar og fleire tilsette skal kontaktast i samsvar med Datatilsynets krav om varsling, opplyser helseføretaket, som understrekar at det ikkje er snakk om pasientjournalar.
Sjukehuset Innlandet opplyser vidare at dei no kontaktar alle desse pasientane og tilsette.
(©NPK)
