Nordre

Skadetrøbbel i hoppleiren, også Stjernen til legeundersøking

Halvanna veke før VM i Seefeld har både Andreas Stjernen og Daniel-André Tande skadebekymringar. Begge reiste måndag heim frå Lahti for å ta røntgenbilde.

Tande har knesmerter etter å ha falle på trening i Lahti fredag, mens Stjernen fekk eit ublidt møte med bakken i prøveomgangen før lagkonkurransen laurdag.

Måndag halta dei begge rundt på flyplassen i Helsingfors på veg heim til Noreg.

Landslagstrenar Alexander Stöckl bekrefta allereie søndag overfor NTB at Tande skal på MR tysdag, og måndag røpte Stjernen at også han reiser rett heim for å få teke røntgenbilde.

- Eg er jo forslått og føler meg ikkje heilt maks i kroppen, men forhåpentlegvis går det bra, sa han til NTB.

- Det er hofta som er verst. Eg slit med å løfte foten, men forhåpentlegvis er det berre at eg er forslått. Vi får håpe musklane blir vekte igjen ganske snart, la Sprova-hopparen til.

Håpar på VM-plass

Det er langt frå sikkert at Stjernen og Tande kan hoppe verdscuprenna i tyske Willingen kommande helg.

- Det hadde sjølvsagt vore det beste, men viss eg ikkje kjem meg dit og likevel blir teken ut til VM, er det berre å få hoppa i Trondheim, sa Stjernen.

Den norske VM-troppen i hopp er inntil vidare ikkje teken ut, men veteranen er trygg på at han har lagt inn ein god søknad om plass.

- Eg har ikkje høyrt noko, men eg føler meg ganske trygg, sa 30-åringen måndag.

Den første VM-konkurransen i Seefeld går neste fredag. Då er det kvalifisering til rennet i den store bakken.

(©NPK)

Andreas Stjernen slit før VM. Foto: Matthias Schrader / AP / NTB scanpix

ANNONSE
Annonse
ANNONSE
Annonse