Skarstein usamd med Uhrenholdt Jacobsen: – Kan ikkje vere eit tema

– Med den angrepskrigen Russland driv med støtte frå Belarus, og den måten dei aktivt bruker idrettsutøvarar til å fremje krigsbodskap, kan det ikkje vere eit tema at dei skal inn i varmen igjen no, skriv Skarstein i ein SMS til NTB.

Den internasjonale olympiske komiteen (IOC) opna onsdag for at russiske og belarusiske utøvarar igjen kan få tilgang til internasjonal idrett. I grunngivinga vart det mellom anna vist til at eit stort fleirtal av utøvarrepresentantane ønskte å sjå på moglegheitene for dette.

Birgit Skarstein sit i den norske utøvarkomiteen som blir leidd av tidlegare langrennsløpar Astrid Uhrenholdt Jacobsen. Parautøvaren deltok på IOC-møtet onsdag og fekk med seg debatten.

– Det er i slike tilfelle som dette at det blir umogleg å skilje idrett og politikk, mellom anna fordi Putin og russiske styresmakter så aktivt bruker sporten og idrettsutøvarar i propagandaaugemed. Putin politiserer idretten, og vi kan ikkje la oss bruke, skriv Skarstein og held fram:

– Det er utøvarar på begge sider her, og sjølv om det er vondt å ikkje få konkurrert som russisk utøvar, så står fleire ukrainske utøvarar ved fronten. Om Russland og Belarus verkeleg vil vere med i OL, kan dei jo slutte å krige.

Usamd

– Det går vel litt mot det Astrid Uhrenholdt Jacobsen har sagt, som har teke til orde for ein diskusjon?

– Ja, vi har vel litt ulik inngang der. Astrid har forfekta ein meir overordna og prinsipiell inngang til spørsmålet, og det trur eg er klokt. Samtidig kan vi ikkje sjå bort frå dei praktiske og realpolitiske konsekvensane av denne situasjonen, svarer Skarstein.

NTB er kjent med at det er fleire ulike synspunkt i utøvarkomiteen

Øyvind Watterdal i utøvarkomiteen trekte seg som varamedlem i Norges idrettsforbunds styre i mars 2022 på bakgrunn av utestenginga av russiske og belarusiske utøvarar.

Det har kokt rundt Uhrenholdt Jacobsen etter at det kom fram at ho hadde teke til orde for ein diskusjon om utestenginga av russiske utøvarar.

– Skal idretten halde fram med å vere nøytral og ha ein nulltoleranse mot diskriminering, kan ein ikkje stengje ute utøvarar på grunn av russisk pass, sa Uhrenholdt Jacobsen til NRK og heldt fram:

– Det er også brot på menneskerettane. Det eg har gjort er å ta til orde for ein diskusjon.

– Vekkjer sterke kjensler

Verken Watterdal eller Uhrenholdt Jacobsen har svart på NTBs førespurnader.

Skarstein støttar likevel opp under Uhrenholdt Jacobsens forklaring om at det var ein prinsipiell diskusjon som ho tok til orde for på IOC-møtet.

– Diskusjonane i komiteen har berre vore på prinsipielt nivå, og det er ikkje fatta nokon vedtak. Utøvarkomiteen har ikkje teke nokre standpunkt på vegner av utøvarane i Noreg, og skulle dei gjort det, hadde det vore ryddig å høyre breitt kva utøvarane meiner, skriv Skarstein og held fram:

– Det er heilt openbert at denne saka vekkjer sterke kjensler.

Norges idrettsforbund (NIF) skreiv også i ei pressemelding fredag at forbundet ikkje ønskjer russisk og belarusisk deltaking i internasjonal idrett.

(©NPK)

Birgit Skarstein er ikkje samd med Astrid Uhrenholdt Jacobsen om russisk deltaking i idretten. Foto: Håkon Mosvold Larsen / NTB / NPK