Skiskyting: Dei norske stafettkvinnene skaut seg bort etter pangstart
Det såg lenge bra ut for dei norske skiskyttarkvinnene i den første stafetten etter VM-bragda, men skytetrøbbel gjorde at dei vart nummer fem. Sverige vann.
Ingrid Landmark Tandrevold starta stafetten med ein flott førsteetappe og sende ut ei Tiril Eckhoff i storform.
Eckhoff viste kvifor ho leier verdscupen individuelt og gjekk ein strålande etappe før ho sende ut Ida Lien på sin etappe med elleve sekund ned til Frankrike.
Lien gjorde ingen feil på den første skytinga, medan resten av feltet sleit stort. Etter den første skytinga leidde Lien med heile 32 sekund på USA på andreplass.
Skytetrøbbel
Lien skaut seg derimot bort på den andre skytinga og hamna i strafferunden etter å ha vore svært uroleg på standplass.
Marte Olsbu Røiseland, som ikkje viste si beste form under VM i februar, gjekk ut på den siste etappen med 36 sekund opp til Sverige i teten.
Også Røiseland sleit på standplass, og ho klarte ikkje hamle opp med Sverige, som vann føre Kviterussland og Frankrike.
Den svenske sigeren betyr at dei òg vann stafettcupen samanlagt i verdscupen.
(©NPK)
Marte Olsbu Røiseland, Ida Lien, Tiril Eckhoff og Ingrid Tandrevold klarte ikkje å gjenta VM-bragda. Foto: Darko Bandic / AP / NTB
