Skøyter: Lorentzen vann verdscupopninga på 500 meter

Håvard Holmefjord Lorentzen gjekk inn til sig på 500 meter då verdscupen på skøyter starta i japanske Obihiro fredag.

Nordmannen gjekk i nest siste par med russiske Pavel Kulizjnikov og gjekk inn til bestetid på 34,74, fire hundredelar framfor den russiske motstandaren.

Det førte nordmannen i tet før siste par skulle gå.

Gao Tingyo frå Kina gjekk mot Tatsuya Shinhama frå Japan. Japanaren gjekk inn til tredjeplass, og dermed starta Lorentzen sesongen på best mogleg vis.

Bøkko på 10.-plass

På 500 meter for kvinner gjekk Hege Bøkko ut i andre par mot koreanske Kim Min-sun. Bøkko gjekk inn til tida 38,60 sekund, noko som var ein førebels andreplass.

Då alle par hadde gått, var 27-åringen dytta ned til 10.-plass.

Regjerande olympisk meister på distansen, Nao Kodaira, vann på 37,49, ei tid som var 1,11 sekund framfor den norske jenta.

Vanessa Herzog frå Austerrike vart nummer to, mens japanske Maki Tsuji vart nummer tre.

Norsk 3.-plass

Det norske herrelaget gjekk til inn tredje beste tid på lagtempoen under verdscupopninga.

Det norske laget bestod av Håvard Bøkko, Sverre Lunde Pedersen og Simen Spieler Nilsen - same trio som sist vinter tok OL-gull på lagtempoen i Sør-Korea.

Den norske trioen kjempa ei stund mot Russland om sigeren, men den russiske tida vart for sterk, og det handla til slutt om å sikre ein plass på sigerspallen.

Det klarte det norske laget, som gjekk i mål på tredjeplass, 1,51 sekund bak det russiske laget. Nederland vart nummer to, 88 hundredelar framfor Noreg.

- Pallen er bra, men vi hadde sjølvsagt håpa på å vinne. Russland gjekk veldig bra, og vi må gå eit toppløp for å vinne verdscupar, sa Håvard Bøkko til NRK etter løpet.

Landslagstrenar Bjarne Rykkje var ikkje like nøgd.

- Eg er ikkje nøgd med plasseringa. Tidene er ganske bra no, men det er mykje å gå på, sa Rykkje og la til at løparane ikkje er heilt i toppform.

Noreg stilte ikkje lag i kvinneklassa.

(©NPK)

Håvard Holmefjord Lorentzen gjekk inn til gull under 1000 meter skøyter i Gangneung Oval under vinter-OL i Pyeongchang.
Foto: Lise Åserud / NTB scanpix

Noreg med Sverre Lunde Pedersen t.h., Håvard Bøkko og Simen Spieler Nilsen t.v. gjekk inn til tredjeplass under i lagkonkurransen då verdscupen opna i Japan fredag. Her er den norske trioen i aksjon i Gangneung Oval under vinter-OL i Pyeongchang tidlegare i år.
Foto: Terje Pedersen / NTB scanpix

Annonse
Annonse