Nordre

Skuleelevar i Bergen streika for klimaet

Fredag skal elevar streike for klimaet i over 1.600 byar over heile verda. I Bergen tjuvstarta studentar og elevar torsdag med protest på Torgallmenningen.

Tusenvis av bergenselevar skulka skulen torsdag for å markere klimakrisa. Streiken vart arrangert av klimarørsla Klimaopprøret, som er ei samanslutning av totalt 22 organisasjonar.

Skulestreiken markerte at barn og ungdom krev sterkare innsats for klimaet frå styresmaktene.

Ikkje gyldig fråvær

I Noreg blir det arrangert fleire skulestreikar fredag, mellom anna i Stavanger, Haugesund, Mandal, Bergen, Gjerstad, Oslo, Trondheim og Ås, ifølgje nettsidene til arrangørane.

Natur og Ungdom har tatt til orde for at dei streikande elevane bør få godkjent fråværet som gyldig på politisk grunnlag.

Kunnskapsminister Jan Tore Sanner (H) rosar engasjementet, men vil ikkje gi gyldig fråvær for streiken.

- Stolt

Rektor Ronny Michelsen ved St. Paul ungdomsskule i Bergen har likevel gitt elevane som streika, gyldig fråvær, skriv Bergensavisen.

- Foreldre har bedt om at fråværet på grunn av aksjonen ikkje blir sett som skulk, og det må vi vere opne for. Miljø- og klimasaka er ein del av medvitet vårt, og dei som ønsker å markere og aksjonere, skal få lov til det, seier han til avisa.

Byrådet i Bergen, gruppeleiarane frå Ap, KrF og Venstre og ordførar Marte Mjøs Persen (Ap) dukka opp for å vise støtta si til dei streikande elevane.

- Menneskeskapte klimaendringar er den største trusselen mot kloden vår. Mange vaksne har sove for lenge i klimatimen, og eg er stolt over elevane i byen som går ut på gatene og krev innsats, seier Roger Valhammer, byråd for barnehage, skule og idrett.

Streikar over heile verda

Dei verdsomspennande demonstrasjonane er inspirerte av den svenske klimaaktivisten Greta Thunberg (16). I fjor byrja ho å skulke skulen kvar fredag for å rette søkelyset mot klimaproblema.

Ifølgje tal på torsdag er det fredag planlagt 209 demonstrasjonar i Frankrike, 195 i Tyskland, 178 i Italia, 158 i USA, 123 i Sverige og 107 i Storbritannia.

Demonstrasjonane skal haldast utanfor rådhus og parlamentsbygningar. Det er planlagt 141 demonstrasjonar i Tyskland, 117 i USA og 95 i Sverige.

Greta Thunberg skriv på Twitter at det blir arrangert skulestreikar på 1.659 stader i 105 land.

- Fredag skulestreikar vi for framtida vår, og vi vil halde fram med det så lenge det trengst. Vaksne er velkommen til å bli med, skriv Thunberg.

(©NPK)

Fleire tusen skuleelevar streika for klimaet og møtte opp på Torgallmenningen i Bergen torsdag. Foto: Marit Hommedal / NTB scanpix

ANNONSE
Annonse
ANNONSE
Annonse