Skuleelevar protesterte mot manglande klimatiltak i Tyskland og Sveits
Fleire tusen skuleelevar demonstrerte fredag i Tyskland og Sveits med krav om større innsats i kampen mot klimaendringane.
I Berlin retta demonstrantane fokus mot bruken av brunkol til kraftproduksjon. Tyske politikarar skal ta stilling til utfasing av brunkolet, som fører til store utslepp av CO2.
Protestane i fleire tital byar i Tyskland og Sveits er inspirert av den 16 år gamle svenske klimaaktivisten Greta Thunberg. Ho gjennomførte i fjor ein «skulestreik» i protest mot manglande tiltak for å kutte utsleppa av klimagassar.
Ein liknande elev-demonstrasjon vart òg gjennomført i den belgiske hovudstaden Brussel torsdag.
Trass talrike politiske løfte om å bremse klimaendringane heilt sidan 1980-talet har dei globale klimautsleppa halde fram å stige. Mange forskarar meiner det no er ekstremt vanskeleg å nå målet om å avgrense den globale oppvarminga til 1,5 eller 2 grader for å unngå katastrofale klimaendringar.
(©NPK)
Skuleelevar protesterte fredag i Lausanne i Sveits med krav om meir effektive klimatiltak. Liknande demonstrasjonar vart også haldne i ei rad andre sveitsiske og tyske byar. Foto: Valentin Flauraud / Keystone / AP / NTB scanpix
Unge klimademonstrantar i Lausanne i Sveits fredag. Foto: Valentin Flauraud / Keystone / AP / NTB scanpix
I Brussel marsjerte skuleelevar i gatene torsdag i håp om å presse politikarane til å innføre strengare klimatiltak. Foto: Geert Vanden Wijngaert / AP / NTB scanpix