Sky stansar sponsing av sykkellag
Det britiske medieselskapet Sky stansar å sponse det profflaget som har hatt stor suksess i sykling frå neste sesong.
Dersom profflaget, som har vore eitt av dei mest dominerande i sporten, skal halde fram òg etter 2019-sesongen blir det under eit anna namn. Medieselskapet opplyste onsdag at dei trekker seg som sponsor etter neste sesong.
Team Sky vart danna i 2010 etter at det vart grunnlagt året før.
- Vi kom inn i sykkelsporten med mål om å løfte sporten på alle nivå. Etter å ha vore involvert rundt ti år kan eg ikkje vere meir stolt over kva vi har oppnådd i Team Sky og samarbeidet vårt med det britiske sykkelforbundet, seier mediehusets administrerande direktør, Jeremy Darroch.
- Utgangen av 2019 er den rette tida å gå inn i eit nytt kapittel i historia til Sky, seier Darroch vidare.
Ingen garanti
På heimesidene til sykkellaget står det at nyheita truleg kjem som ei stor overrasking på mange, men at dei vil halde fram òg etter 2019 dersom dei finn ein ny sponsor.
- Vi vil avslutte kapittelet med Sky på sterkast mogleg måte, og kan vi finne ein ny partnar som kan ta laget inn i ein ny æra, vil vi gjere det, skriv Team Sky.
- Men kvar og ein framtidig partnar må vere den rette partnaren, ein som delar verdiane våre. Kva som skjer frå 2020 kan vi ikkje garantere, men uansett kva som skjer, vil det vere avklart før Tour de France i juli, står det vidare.
Der blir òg alle Team Sky-ryttarar og hjelparar takka, både noverande og dei som har vore med tidlegare år.
Dei norske ryttarane Edvald Boasson Hagen, Lars Petter Nordhaug, Kurt Asle Arvesen og Gabriel Rasch har køyrt for laget, mens Kristoffer Halvorsen no er einaste nordmann i Team Sky.
Stor suksess
Laget har sidan 2010 har laga køyrt under namna Sky Procycling og Team Sky. Dei har hatt stor suksess i Tour de France, som med eitt unntak er vunne av ein Sky-ryttar kvart år sidan 2012.
Høvesvis Bradley Wiggins, Chris Froome og seinast Geraint Thomas har triumfert i rittet mens dei har vore på lønningslista til det britiske sykkellaget.
Ifølgje Sky sjølv har laga vunne 322 sigrar sidan 2010. Dette inkluderer åtte sigrar i Grand Tour-ritt, 52 sigrar i andre etappeløp, og dessutan 25 sigrar i eindagersritt.
Med ryttarar som Chris Froome, Sergio Henao, Michal Kwiatkowski, Wout Poels, Egan Bernal og Geraint Thomas verker det sannsynleg som om sigerslista vil auke ytterlegare.
(©NPK)
Lars Petter Nordhaug er ein av fleire nordmenn som har sykla for Team Sky. Frå neste år stansar Sky si sponsing av laget. Foto: Vegard Wivestad Grøtt / NTB scanpix
Team Sky under sykkel-VM i Bergen 2017. Foto: Cornelius Poppe / NTB scanpix
