Slik blir dei nye Oslo-trikkane
Vinteren 2020-21 får Oslo nye trikkar. Dei nye trikkane skal kunne frakte 100 millionar passasjerar i året.
- Dei som reiser med dei nye trikkane, vil oppleve ei stor oppgradering samanlikna med trikketilbodet i dag, seier prosjektsjef Bjørn Bjune i Sporveien Trikken i ei pressemelding.
Tysdag vart prototypen av dei nye trikkane som skal rullast inn i hovudstaden om halvtanna år, presentert. Denne prototypen er tilnærma lik dei 87 nye trikkane som er bestilte frå spanske CAF, men er noko kortare. I dag har Sporveien totalt 71 trikkar.
Kvar av dei nye trikkane har ein kapasitet på 220 passasjerar. I dag reiser 50 millionar menneske med trikken kvart år, medan ein med fleire og større trikkar kan frakte 100 millionar menneske.
Dei nye trikkane kjem òg med lågt golv, som skal gjere av- og påstiging enklare, spesielt for dei med rullestol eller barnevogn. Dei er 34,16 meter lange, 2,65 meter breie og vil få seks dører, mot dagens fire.
(©NPK)
Slik blir dei nye trikkane som skal rullast ut i Oslo vinteren 2020-21 sjåande ut. Foto: Ina Helen Østby / Sporveien / NTB scanpix
Dei nye trikkane vil blant anna få USB-kontaktar og god sikt til digitale fargeskjermar, og dei får eit opent miljø som kan minne om dagens T-baner i Oslo. Foto: Ina Helen Østby / Sporveien / NTB scanpix
Trikkane er universelt forma ut og vil få lågt golv for å gjere av- og påstiging enklare, spesielt for passasjerar med rullestol og barnevogn. Foto: Ina Helen Østby / Sporveien / NTB scanpix
