Slik kan Støre-regjeringa bli, ifølgje ulike medium
Torsdag presenterer Ap-leiar Jonas Gahr Støre si regjering. Både Ap og Sp understrekar at ingenting er klart før alt er klart. Slik spekulerer ulike medium om kven som blir statsrådar:
- Dagbladet melder å ha fått stadfesta frå sentralt hald at Ap får elleve statsrådar, medan Senterpartiet får åtte. Éin statsrådspost blir slanka bort – ifølgje avisa er det distrikts- og digitaliseringsministeren.
- Dagens Næringsliv, VG og Aftenposten erfarer alle at Sp-leiar Trygve Slagsvold Vedum blir finansminister.
- DN, NRK og fleire medium har kjelder på at Anniken Huitfeldt (Ap) blir utanriksminister.
- Ap-nestleiar Hadia Tajik blir arbeids-, sosial og integreringsminister, ifølgje kjelder DN og NRK har snakka med.
- Tonje Brenna (Ap) blir kunnskapsminister, ifølgje DN. NRK melder at fleire kjelder nemner henne, men NRK har ikkje fått dette stadfesta.
- Ifølgje DN blir Anette Trettebergstuen (Ap) kulturminister, medan Espen Barth Eide (Ap) blir miljø- og klimaminister. NRK meiner og å vite at Barth Eide skal inn i regjering, men har ikkje fått stadfesta kva departement.
- Tidlegare ordførar i Bergen, Marte Mjøs Persen (Ap), blir ny olje- og energiminister, opplyser kjelder til Dagbladet.
- Ifølgje VGs opplysningar blir Ingvild Kjerkol (Ap) helseminister.
- Dagbladet og NRK erfarer at Ap-nestleiar Bjørnar Skjæran blir fiskeriminister.
- Både VG og NRK melder at gründeren og forretningsmannen Jan Christian Vestre (Ap) blir næringsminister i den nye regjeringa.
- Sps 2. nestleiar Anne Beate Tvinnereim (Sp) blir bistandsminister, ifølgje Aftenposten.
- Same avis skriv at Bjørn Arild Gram (Sp), styreleiar i KS, blir kommunalminister. Det har òg NRK kjelder på.
- Aftenposten skriv at 1. nestleiar Ola Borten Moe (Sp) blir forskings- og høgare utdanningsminister. Det har tidlegare vore spekulert i at han ville bli forsvarsminister.
- Sps Emilie Mehl skal òg bli statsråd, ifølgje Aftenposten, Dagbladet og NRKs kjelder, men det er ikkje stadfesta kva post.
- Odd Roger Enoksen (Sp) er på veg tilbake i politikken og regjeringa, ifølgje High North News og Bladet Vesterålen, og ifølgje VG blir han forsvarsminister.
- TV 2 melder at Jon-Ivar Nygård (Sp) blir samferdselsminister i den nye regjeringa.
- Sandra Borch (Sp) blir ny landbruks- og matminister, melder blant andre Aftenposten og TV 2.
(©NPK)
