SOHR: Over 20 drepne i USA-leidd angrep i Syria
Minst 23 menneske er drepne i eit luftangrep utført av den USA-leidde koalisjonen i ein IS-kontrollert landsby aust i Syria, ifølgje eksilgruppa SOHR.
Den USA-leidde koalisjonen har førebels ikkje kommentert meldingane.
Blant dei drepne er minst seks sivile, opplyser Syrian Observatory for Human Rights (SOHR). Det statlege syriske nyheitsbyrået SANA melder at 20 vart drepne i luftangrepet i landsbyen Baghouz, som ligg i det siste IS-kontrollerte området i landet.
I byen Idlib nordvest i Syria vart minst elleve personar drepne i eit bombeangrep mot al-Qaida-allierte krigarar fredag. Lokale innbyggarar seier angrepet ramma hovudkvarteret til jihadistgruppa Hayat Tahrir al-Sham (HTS), som kontrollerer byen Idlib og provinsen med same namn.
Sju av dei drepne var krigarar, ifølgje SOHR, som trur IS stod bak angrepet, som gjengjelding for at HTS likviderte fleire IS-medlemmer torsdag.
(©NPK)
