SOHR: Syriske luftangrep drap minst 14 sivile - halvparten var barn
Minst 14 menneske, blant dei to redningsarbeidarar og sju barn, er drepne i nye luftangrep mot opprørskontrollerte område nordvest i Syria, opplyser SOHR.
Dei to redningsarbeidarane var i ein ambulanse i byen Maaret al-Noman, opplyser eksilgruppa Syrian Observatory for Human Rights (SOHR) torsdag.
Gruppa har eit breitt nettverk av kjelder på bakken i Syria.
Dei sju barna vart drepne i ulike delar av Idlib-provinsen, der opprørarar framleis kontrollerer mesteparten av områda.
Det bur rundt 3 millionar menneske i Idlib, mange av dei er internt fordrive frå andre område i Syria der regjeringshæren har vunne tilbake kontroll.
Dei omfattande luftangrepa mot provinsen starta i slutten av april. FN og hjelpeorganisasjonar har åtvara mot at offensiven vil føre til ein humanitær katastrofe.
(©NPK)
Ein død person blir boren bort etter eit luftangrep i byen Hish i Idlib-provinsen torsdag. Foto: AP / NTB scanpix
