Nordre

Solskjærs krise: - Sit fast i ei hengemyr av halvgode prestasjonar

EM-kvalikpausen har ikkje gitt Manchester United-manager Ole Gunnar Solskjær ro. Det koker meir rundt han enn nokon gong før. Norwich-kampen kan bli heilt avgjerande.

Tallause artiklar om han er å finne i engelske aviser og nettstader. Ikkje sjeldan er det fleire same stad same dag.

BBC radio brukte tysdag mykje tid - 23 minutt - på å diskutere kva som har skjedd og kan komme til å hende med Solskjær i United.

- Han har framleis støtte i klubben slik eg opplever det, men det er uklart kva for krefter som kan setjast i gang om United blir påført eit klart tap mot Liverpool (20. oktober), sa BBCs mangeårige Manchester-korrespondent Simon Stone.

Han tar i desse dagane fleire atterhald rundt Solskjærs framtid enn for berre eit par veker sidan. Stone gjentok tysdag langt på veg det han skreiv i ein djuptpløyande analyse måndag.

Stone har inngåande kjennskap til klubben og mange kjelder. Dette sa ein av desse etter tapet mot Newcastle:

- Vi sit fast i ei hengemyr av halvgode prestasjonar.

Over?

Den mest lesne avisa i Storbritannia, The Sun, melde tysdag at Solskjærs verkelege syretest kjem borte mot Norwich 27. oktober. Før det ventar altså Liverpool heime.

Avisa skreiv at United-toppane allereie så godt som har avskrive poeng der. Eit nederlag mot Norwich vil bety at United kan vere på nedrykksplass etter den kampen.

Ifølgje The Sun og deira ikkje namngitte kjelder vil i så fall spørsmålet om å gi Solskjær sparken bli svært aktuelt. Skulle det skje, vil det vere to og eit halvt år før kontrakten hans går ut.

Mellom desse to oppgjera skal United spele ein vrien bortekamp i Europaligaen mot Partizan Beograd.

Oddsen hos spelselskapa for at Solskjær er neste Premier League-manager til å miste jobben, vart òg kraftig sett ned denne veka.

Tøft

Kamplista gir heller inga glede for Solskjær. Laget hans spelar fire gonger borte i perioden 24. oktober til 2. november. Det betyr fleire belastande reiser og mindre tid til restitusjon og trening.

Ifølgje ei undersøking gjennomført av selskapet Kantar frå 2013, skal klubben ha vel 650 millionar tilhengarar. Statistikkane er no brutale å lese for United-fansen verda rundt:

Berre fem sigrar på dei siste 23 kampane.

Ni poeng på åtte seriekampar er verste sesongstart på 30 år.

17 poeng på dei siste 17 seriekampane.

Ikkje vunne borte på elleve siste forsøk.

Til saman eitt skot på mål på 180 minutt mot AZ Alkmaar og Newcastle førre veke.

Spissen Marcus Rashford har eitt spelemål på sine 18 siste kampar.

Solskjærs sigersprosent (47,50) er den svakaste for managerane i klubben sidan Dave Sexton i 1977-81.

(©NPK)

Manchester United-manager Ole Gunnar Solskjær er under eit enormt press om dagen. Foto: Erik Johansen / NTB scanpix

ANNONSE
Annonse
ANNONSE
Annonse