Son gråt av glede etter VM-skrellen: – Venta lenge på dette

Sør-Korea styrte mot sisteplass og VM-exit, men på overtid snudde alt. Tottenham-stjerna Son Heung-min var full av kjensler etter sigeren mot Portugal.

– Dette er gledestårer. Vi har venta veldig lenge på denne augneblinken, og spelargruppa har trudd at det var mogleg heile vegen, sa Son etter sluttdramaet i Qatar.

Sør-Koreas kaptein var mannen som snappa ballen etter eit portugisisk hjørnespark og spelte den vidare til matchvinnar Hwang Hee-chan. 2-1-målet kom i første tilleggsminutt i ei vill avslutning i VMs pulje H.

Med sigeren spratt sørkoreanarane opp frå jumboplassen og vart toar bak Portugal. Saman tok dei seg vidare til åttedelsfinalane. Son og co. gjorde det på fleire skåra mål enn Uruguay etter at begge enda på fire poeng og lik målforskjell.

– Det har vore stunder der eg ikkje har vore på mitt beste, så eg vil takke lagkameratane for at dei drog lasset då eg ikkje var i stand til å gjere det. Eg er veldig stolte av dei, sa Son.

Tottenham-mannen speler med ansiktsmaske i VM. Han fekk ein ansiktsskade kort tid før sluttspelet.

Sør-Korea er vidare frå puljespelet for tredje gong i VM-historia. Det vart tidleg slutt i både 2014 og 2018. Asiatane tok ein sensasjonell fjerdeplass då Sør-Korea var delvert i 2002.

(©NPK)

Son Heung-min var ein emosjonell mann etter at Sør-Korea slo Portugal og gjekk vidare i fotball-VM. Foto: Ariel Schalit / AP / NTB