Sørloth debuterte for Gent med to mål i treningskamp

Alexander Sørloth scora to mål i debuten for belgiske Gent. Han gjorde både 1-0 og 2-0 i treningskampen på torsdag mot tyske Holstein Kiel, som vart vunne 6-1.

Kampen vart spelt i OIiva i Spania, der laga er på treningsleir i vinterpausen.

Trønderen vart henta til Gent på utlån frå Crystal Palace av den danske trenaren Jess Thorup og viste umiddelbart at målteften ikkje vart borte i månadene med minimal speletid i Premier League.

Sørloth nikka inn 1-0 i det 29. minuttet og dobla leiinga åleine med keeper i det 49. minuttet. Han spelte på høgresida i Gent-angrepet, der Roman Jaremtsjuk var midtspiss.

Sørloth hadde Thorup som trenar i danske Midtjylland, der han scora 15 mål på 26 kampar i 2017.

Treningskampen på torsdag vart ifølgje Gents nettstad spelt i fire omgangar à 30 minutt, slik at flest mogleg spelarar skulle få speletid og kamptrening. Sigurd Rosted var blant dei som kom inn etter kvart.

(©NPK)

Alexander Sørloth scora to mål i debuten for belgiske Gent i ein treningskamp i Spania torsdag. Foto: Lise Åserud / NTB scanpix

ANNONSE
Annonse