Sp langt over Frp i ny svak måling for regjeringa

Sp går opp til rekordhøge 15,6 prosent oppslutning i ei meiningsmåling for februar. Samtidig går alle regjeringspartia ned.

Målinga er utført av Sentio på oppdrag for Nettavisen og Amedia.

Resultatet er Sps beste nokosinne på ei Sentio-måling, og ein oppgang på 2,2 prosentpoeng frå januar. 15,6 prosent er 5,3 prosentpoeng opp frå stortingsvalet i 2017, og i målinga er Sp det tredje største partiet i landet.

Også dei andre raudgrøne partia går opp på målinga. Ap og SV stig med 1,1 prosentpoeng kvar, opp til høvesvis 27,4 og 8 prosent.

Størst nedgang har Høgre, som går ned 2,6 prosentpoeng til 21,1. Frp går ned 2,4 prosentpoeng til 10,8 og KrF går ned 0,1 prosentpoeng til 3,4, mens Venstre går ned 2 prosentpoeng til 2,3 prosent.

I tillegg går Raudt opp 2 prosentpoeng til 5,1, og MDG går opp 0,1 til 3,9 prosents oppslutning.

Om målinga var valresultat ville det ført til regjeringsskifte, og Ap, Sp og SV ville fått eit klart fleirtal med 95 mandat på Stortinget.

Målinga er utført mellom 12. og 17. februar, og 1.000 personar har svart på kva dei ville stemt om det var stortingsval i morgon. Feilmarginen er på mellom 1,2 og 3,4 prosent.

(©NPK)

Senterpartiet og leiar Trygve Slagsvold Vedum gjer det skarpt på meiningsmålingane for tida. Foto: Tore Meek / NTB scanpix.

Annonse
Annonse