Stadig fleire melder seg ut av kyrkja
Medlemstalet i Den norske kyrkja held fram med å gå ned. Frå starten av året til utgangen av juni hadde 6.411 personar meldt seg ut.
Det er ein auke frå same tid i fjor, då talet på utmeldingar enda på 5.981, viser statistikk som NTB har fått frå Kyrkjerådet.
Samtidig har talet på innmeldingar gått noko opp i første halvår i år samanlikna med i fjor. Så langt har 1.437 personar meldt seg inn i Kyrkja, mot 1.246 i fjor. Tala omfattar likevel ikkje årets døypte, berre dei som har vorte døypte i eit anna kyrkjesamfunn eller tidlegare har vore utmeldt.
Kyrkja mista i fjor 16.000 medlemmer og har no 214.000 færre medlemmer enn i 2005, ifølgje statistikk frå SSB. I 2018 var 70 prosent av befolkninga medlemmer i Den norske kyrkja, mot 73 prosent i 2015.
(©NPK)
I fjor mista kyrkja 16.000 medlemmer. Illustrasjonsfoto: Gorm Kallestad / NTB scanpix
